Барааны тайлбар:

Харвардын их сургуулийн оюутан 18 настай залуу дэлхий ертөнцийг холбосон нийгмийн сүлжээ байгуулах алсын зорилго, том мөрөөдөлдөө хөтлөгдөн Фэйсбүүк сайтыг үүсгэн байгуулжээ. Ирээдүйн агуу "программист" маань шинэ содон санаагаа бушуухан ажил хэргэх болгох хүсэлдээ хөтлөгдөн сургуулиа ч хаяв. Жижиг өрөө түрээслэн, гудас дэвсэн газар унтдаг, богино ханцуйтай малгайтай цамц, жинсэн өмднөөс салдаггүй бүрэг ичимхий даруухан залууг мэдээлэл технологийн салбарт тэсрэлт хийж хорин гуравхан насандаа дэлхийн хамгийн залуу тэрбумтан болно гэж ёстой зүүдлэх ч үгүй биз дээ. Гар хоосноос мөрөөдөлдөө үнэнч явсныхаа хүчээр тийм л гайхамшигтай амжилтанд хүрчээ. Фэйсбүүк хүмүүсийн сонирхолыг татаж, хүрээгээ тэлж, дөнгөж л шинэ эриний үүр цайж байсан үед технологийн том акул болох Yahoo компани нэг тэрбум доллараар шинэ санааг нь худалдан авах санал тавихад татгалзжээ. Өөртөө итгэлтэй, ирээдүйгээ харж чадсан залуу хүний зоригтой шийдвэр юм даа. Насан туршдаа хангалуун амьдрах тийм их мөнгөнөөс яагаад татгалзсан шалтгаанаа " Та бүхэн миний амьдардаг байрыг харсан биз дээ. Надад тийм их мөнгө хэрэггүй" гэж даруухан хариулсан гэнэ. Халаас хоосон оюутнаас дэлхийн тэрбумтан болсон ч түүний амьдралын хэвшил, хэрэглээ өөрчлөгдсөнгүй. Богино ханцуйтай малгайтай цамц, жинсэн өмд, эгэл даруухан хэрэглээ тэгээд л болоо. "Мөнх амьдрахгүй энэ ертөнцөд би өөрийгөө хамгийн баян хүн гэж дуудуулах нь ямар ч утга учиргүй хэрэг. Нэг өдрийн ажлаа дуусгаад, орой орондоо орох үедээ өнөөдөр үнэ цэнтэй, агуу зүйл хийлээ гэж өөрөөрөө бахархах л хамгийн чухал зүйл" гэж Стив Жобсийн хэлсэн үг түүний амьдралын хэв маяг болсон гэлтэй. Өнөөдөр бид түүний бий болгосон "Фэйсбүүкийн эзэнт гүрэн"-д амьдралынхаа багагүй хэсгийг өнгөрөөдөг болсон тул мэдээлэл технологийн салбарт шинэ нээлт хийсэн энэ залуугийн амжилтанд хүрсэн түүх хийгээд фэйсбүүкийн талаарх сонин содон зүйлс, ирээдүйнх нь зорилго чиглэлийг энэ номоос мэдэж авч болох юм. "Фэйсбүүкийн оршин буй учир шалтгаан бол нээлттэй харилцаа холбоо бүхий ертөнцийг бий болгох юм" гол зорилгоо тодорхойлсон тэрбум гаруй хүн амтай энэ гүрний залуу эзэн цаашид юу бодож төлөвлөж, биднийг юугаар гайхшруулах бол гэдэг тун сонин байна шүү!

#706